ياترى ايه اخبار مسلسلات رمضان ؟

كل سنة وأنتم طيبين
ويارب رمضان السنة دي يكون مختلف عن كل رمضان

سؤال شائع جدا فى الشارع المصرى والعربى :

إيه أخر أخبار مسلسلات رمضان!!
وياترى هنتابع أيه من المسلسلات السنه دى؟؟

ومن باب التغير وبخصوص المسلسلات
برضه هنسأل سؤال جديد

بس قبل ما نسأل السؤال عايزين نقرا الموضوع لأخره (مدته اقل من ربع تتر أى مسلسل)

وهستبدل سؤال
هنتابع إيه من المسلسلات السنه دي ؟؟
ب

هنتابع ليه مسلسلات السنه دي؟؟؟؟؟؟؟

صحيح هنتابع ليه؟؟

بسألكم ليه؟؟

أنا مش هبدأ بحلال ولاحرام

بس بالراحة كدة ياريت نجاوب على الكام سؤال دول أولا بعقولنا ..

وهتتفق على كام حاجة وبعدين نرجع نسأل ليه؟؟

لو عندك إمتحان ثانوية عامة وفاضل على الإمتحان شهر واحد ياترى هتتفرج فى الشهر ده على مسلسلات؟؟

أو فرحك بعد شهر وبتجهز للفرح والشقه بتكملها وباقى على الزقاف شهر هتسيب دة وتتفرج على مسلسلات؟؟

أو دخلت مسابقة من سيربح المليون! ومدة السفر شهر و عمال تذاكر عشان طمعان فى المليون ممكن تسيب دة وتتفرج على مسلسلات؟؟

أو لو اتقدملك عرض إنك تفرغ نفسك لمده شهر بعد شغلك مقابل مبلغ 10 الاف جنيه او حتى 5 او 3 ساعتها ممكن تضيع العرض وتتفرج على مسلسلات؟؟

أو لو هتناقش رسالة الدكتوارة أو ...أو ......

خلاصة الكلام ساعتها هتقول اخلص المهمة الى فى إيدى و اعدى الشهر والمسلسلات بتتعاد طول السنه مش كدة؟؟

1يبقى اتفقنا على أول نقطة : لو فى حاجة مهمة وهدف وعايز احققه فى شهر مش هتهتم بالمسلسلات...ولو مدمن مسلسلات برضة هتسيبها وتشوفها فى الإعادة بعد الشهر.. تمام؟؟

طيب هو أنت مش لاقى ليك هدف فى رمضان؟؟؟

يعنى العتق من النار لا يساوى 3 ألاف جنية أو مسابقة أو أى هدف دنيوى أخر؟؟

عادى دة اختلاف وجهات نظر وكل واحد حر طبعا....بس الى حاسس إن الموضوع مش مهم ياريت يروح للمطبخ دلوقتى
ويولع البوتوجاز ويحط إيده على النار ربع ساعة ..
ولو الموضوع كان ممتع زود المده على النار ساعه
و10 ساعات وبعدين لو عجبه الموضوع أكثر ممكن ياخد شاور نار ساخن عشان الموضوع يشمل جسده كله !!!

وساعتها خلاص كبر دماغك من موضوع العتق من النار لإن أنت قدها وقدود!!

سبحان الله مش مقصود التريقة ولكن والله أحنا ضعفاء جدا وغلابة وشوية برد بيرقدونا فى السرير أيام !
وناموسة بتقل راحتنا !

فليه نضيع فرصة زى رمضان !!!!!!!!!!

ورمضان فرصة عظيمة: مغفرة للذنوب _إستجابه للدعاء_وفرصة لتغير حياتك والقرب من الله_وعتق من النار_ومضاعفة الحسنات _و........و............

2 تانى نقطة: فى قاعدة فقهية بتقول
إذا عظم الداعى وامتنع الفعل عظُمَ الأجر
واذا ضعف الداعى وتم الفعل عظُمَ الوزر

الكلام ده معناه إية؟؟
لو واحد الظروف الى حواليه كلها تساعد على المعصية ومع كدة معملهاش يبقى أجره كبير
زى قصه سيدنا يوسف وامرأه العزيز

أما لو واحد الظروف الى حواليه معينة على الطاعة
يعنى مفيش داعى للمعصية ومع كدة عملها يبقى الوزر كبير
وعشان كدة كان من الثلاثة الذين لا ينظر الله لهم يوم القيامة الشيخ الزانى

يعنى فى الرمضان الشياطين مصفدة وأبواب النار مغلقة وأبواب الجنة مفتوحة والناس فى تسابق فى الخيرات

واحد بيختم قرءان وواحد بيقيم ليل وواحد بيتصدق و.......و..

لو أنت عصيت هيبقى الوزر كبيييييييييييير لأن الجو كله جو طاعة

3التالتة : مش أنت دايما بتقول أنا كويس صحيح أنا بعصى ربنا بس من جوايا كويس ...مش كلنا بنقول كدة!!

طب اثبت ..شيطانك الى بتتحجج به مش موجود يعنى لو عصيت تبقى أنت مش كويس ولا حاجة

طب أنت ترضى تبقى من أسوء عباد ربنا ...
ترضى كل الناس تطيعه وأنت مُصِر على معصيته

ليه ...أحنا افضل من كدة؟؟
أكيد إن شاء الله أفضل...
كل واحد فيه خير أوعى يضيعه ..

4وفى النهاية ممكن حد يقول :
ليه كل دة أنا بتابع مسلسلات كويسة يعنى مفهاش حاجة ومش هيحصل حاجة لو شوية طاعات وشوية مسلسلات؟؟؟

فيها إيه ؟؟
هو دة موضوعنا هنقول 30 سبب و30 مشكلة سببها المسلسلات

وهنتكلم عن المسلسلات المحترمة مش هتكلم عن غيرها

قبل ما نبدأ هو مش المسلسلات المحترمة دي !!

مش فيها نساء بدون حجاب ورؤيتهم حرام بلا خلاف
مش فيها ممثلة بتتعامل بكل بساطة مع ابنها أو زوجها فى المسلسل وهو أصلا رجل غريب عنها
مش فيها أغانى ؟ودى حرام مفهاش كلام !

مش فيها قصة حب ؟؟
مش فيها غفلة وإلهاء عن ذكر الله؟
مش فيها إنك بتضيع فرصة رمضان بكل ما فيها برغم إنك مش ممكن تضيع فرصة دنيوية بنفس الطريقة !

وأبسطها

أحنا عارفين إن أى حاجة وكل حاجة
إما فى ميزان حسناتنا أو ميزان سيئاتنا ؟
فالمسلسلات هتبقى فين؟؟؟

اكيد مش ممكن تبقى مع القرآن والصلاة والدعاء والصدقة ...

هتبقى فين؟

ليه نعمل كدة وإيه الفايدة ؟؟؟؟؟؟؟؟؟؟؟؟
وارجع أختم كلامى بسؤال بدأت بيه :

ليه نتفرج على مسلسلات رمضان السنه دي ؟؟

خسارة نضيع وقتنا فى معصية
معقول الناس بتطيع ربنا ! وأنت تعصاه!!

اوعى تكون بعيد فى وقت الناس كلها بتحاول تقرب
أنت مش سىء قوى كدة؟
فيك خير ولا يحرم الرحمة فى رمضان إلا محروم شقى
..فلا تكن أنت

ولو فى حد حريص على المعاصى قوى والعياذ بالله
وخايف جدا لسيئاته تقل..
يطمن كل المسلسلات بتتعاد بعد رمضان فلن يفوته الوزر

ولكن أبدأ فى رمضان وإن شاء الله تبقى توبة نصوحة لطول العام

ان شاء الله نكون كلنا مش لاقين إجابه لسؤال:
هنتفرج على مسلسلات ليه السنه دى؟؟

وإليكم إجابه سؤال :
مش هنتفرج ليه على مسلسلات السنه دى؟؟

هنقول 30 سبب كل يوم سبب لعدم مشاهدة المسلسلات
قال تعالى(وذكر فإن الذكرى تنفع المؤمنين)
فاللهم اجعلنا منهم وانفعنا بها

ولازم نخاف قوى قوى اننا نكون من الى قال الله فيهم
(سواء عليهم ءانذرتهم أم لم تنذرهم لا يؤمنون)

أعوذ بالله ان نكون منهم

منقول

كل عام وانتى بخير اختى نور

تسلم الايادى بجد موضوه قيم ومهم جداااااااااااااا وعندك حق

اللهم بلغنا رمضان

متميزه فى اختيارك للمواضيه جزاكى الله كل خير

صدقت ست نور...فرمضان أوله رحمة وأوسطه مغفرة وآخره عتق من النار...فمن الحري بنا أن نستغل أيامه ولياليه في الطاعة والعبادة والاستغفار وقراءة القرآن ...لعل الله ينظر إلينا بعين الرحمة والغفران ...والله المستعان

[ندعوك للتسجيل في المنتدى أو التعريف بنفسك لمعاينة هذه الصورة]

» خبرسعيد من اخبار المدرسه
» الدياسطى فى رمضان
» غرائب الشعوب فى رمضان
» أشجار تنبت فى رمضان
» أجمل ماقيل من الشعر عن استقبال شهر رمضان